Azərbaycan-Fransa Ticarət və Sənaye Palatasında (AFchamber) yeni təyinat olub.

Yurd.Media-nın əldə etdiyi məlumata görə, Günel Behbudova Palatada Hüquq və Tənzimləmə Komitəsinin sədr müavini təyin olunub.

G.Behbudova bu təyinata qədər "Paşa Sığorta"da departament müdiri vəzifəsində çalışıb.

Qeyd edək ki, Azərbaycan-Fransa Ticarət və Sənaye Palatası 2016-cı ildən fəaliyyət göstərir və əsas məqsədi Azərbaycan Respublikası ilə Fransa Respublikası arasında qarşılıqlı iqtisadi və dostluq münasibətlərini inkişaf etdirməkdir. Palatanın missiyası üzvlərini unikal şəbəkələşmə imkanları ilə təmin etməkdir. Eyni zamanda, Palata məlumatlandırıcı və maarifləndirici rol oynamaqla, həm üzv şirkətlərə, həm də daha böyük biznes icmasına təsir edən aktual məsələləri hədəfləyərək hər ay rəsmi tədbirlər təşkil edir və üzv şirkətlərə Palatanın platforması vasitəsilə öz bizneslərini inkişaf etdirmək üçün yardım təklif edir. Hal-hazırda Palatanın 60-dan çox yerli, fransız və beynəlxalq üzv şirkəti var.

ABŞ Prezidenti Donald Trampın oğlu kiçik Donald Tramp İrana qarşı müharibənin əleyhinə olub.

Bu barədə “The Atlantic” jurnalı mənbələrə istinadən məlumat yayıb.

Bildirilib ki, Trampın oğlu şəxsi söhbətlərdə ABŞ-nin Yaxın Şərqdəki münaqişədə iştirakına qarşı çıxıb və bu mövqeyini atasına çatdırıb.

Jurnalın həmsöhbətləri qeyd ediblər ki, o, hər zaman xarici müdaxilələrə skeptik yanaşıb, lakin bu barədə açıq şəkildə bəyanat vermir.

“O bu məsələdə öz baxışlarını açıqlamamağa üstünlük verir, çünki belə bir mövzuda atası ilə açıq şəkildə fikir ayrılığına heç vaxt getməz”, - mənbə bildirib.

Qeyd edək ki, “Pew Research Center”in sorğusuna görə, amerikalıların 65%-i Donald Trampın İrana qarşı əməliyyat aparmaq qərarını dəstəkləmir.

Ermənistanın Avrasiya İqtisadi İttifaqına (Aİİ) üzvlüyünün dayandırılması halında Rusiyadan ölkəyə pul köçürmələrinin həcmi yarıdan çox azalaraq 2025-ci ildəki 3,88 milyard dollarla müqayisədə 1,8 milyard dollara düşə bilər.

"Report" Rusiya mediasına istinadən xəbər verir ki, bu barədə Rusiya, Belarus, Ermənistan və Qazaxıstanın birgə hesabatında qeyd olunub. Sənəd Rusiya hökumətinin saytında dərc edilib.

"Bütün Aİİ ölkələrindən Ermənistana köçürmələrin ümumi göstəricisi 2025-ci ildə 3,95 milyard dollardan 1,85 milyard dollara qədər azala bilər," - sənəddə bildirilib.

Bundan əlavə, Ermənistanın Aİİ-də iştirakının dayandırılması qazın qiymətinin 1 min kubmetr üçün 177,5 dollardan 300 dollara qədər, yəni 69 % artmasına gətirib çıxara bilər.

"Ermənistanın Aİİ-yə üzv dövlətlərdən qaz idxalı üzrə ssenari qiymətləndirməsi tədarükün fiziki həcmi dəyişməz qalmaqla 1 000 kubmetr üçün 300 ABŞ dolları qiymətini nəzərdə tutur. Hazırda qüvvədə olan 177,5 ABŞ dolları baza qiyməti ilə müqayisədə artım təxminən 69 % təşkil edəcək", - hesabatda qeyd olunub.

Bununla yanaşı, bildirilib ki, bu göstərici indikativ xarakter daşıyır və bazar konyunkturası nəzərə alınmaqla real qiymət daha yüksək ola bilər.

Ermənistan və Rusiya dəmir yolunun fəaliyyəti məsələlərinin həlli üçün işçi qrup yaradacaq.
"Report" erməni mediasına istinadən xəbər verir ki, bu barədə Ermənistanın Baş naziri Nikol Paşinyanın Rusiya Dəmir Yollarının baş direktoru Oleq Belozorovla görüşünün yekunlarına dair hökumətin məlumatında deyilir.
"Müəyyən edilmiş qısa müddətlərdə formalaşdırılmış problemlərin müzakirəsi, mümkün həll yollarının axtarışı və sonrakı addımların dəqiqləşdirilməsi məqsədilə birgə işçi qrupunun yaradılması barədə razılıq əldə edilib", - məlumatda deyilir.
İrəvanda keçirilən görüş zamanı Paşinyan qeyd edib ki, regional nəqliyyat infrastrukturlarının blokadadan çıxarılması imkanlarını nəzərə alaraq, Ermənistan hökumətinin məqsədi dəmir yollarını rəqabətqabiliyyətli etmək, onları qonşu dövlətlərin dəmir yolu şəbəkəsinə və beynəlxalq şəbəkəyə inteqrasiya etməkdir. Bu kontekstdə həmsöhbətlər regional proseslər çərçivəsində yaranan imkanları və Ermənistan dəmir yollarının rəqabətqabiliyyətliliyinin artırılmasına və onların beynəlxalq nəqliyyat marşrutlarına inteqrasiyasına yönəlmiş addımları müzakirə ediblər.
"Gümrü-Axurık-Türkiyə sərhədi və Yeraskh-Naxçıvan (Azərbaycan) hissələrində dəmir yollarının yenidən qurulması layihələri barədə fikir mübadiləsi aparılıb", - məlumatda deyilir.
Qeyd olunur ki, tərəflər "Cənubi Qafqaz dəmir yolları" şirkətinin konsessiya idarəçiliyi dövründə infrastrukturun inkişafı üzrə işləri, idarəetmənin səmərəliliyini, mövcud problemləri və onların həlli imkanlarını müzakirə ediblər.

“Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidməti” publik hüquqi şəxsi tərəfindən 05 may 2026-cı il tarixində Zəngilan rayonu, Zəngilan kənd yaşayış məntəqəsində fərdi yaşayış evləri, çoxmənzilli binalar və mühəndis kommunikasiya sistemlərinin tikinti-quraşdırma işlərinin satın alınması üçün keçirilən açıq tenderdə “19 SAYLI TİKİNTİ TƏMİR İDARƏSİ” Məhdud Məsuliyyətli Cəmiyyəti qalib elan olunmuş və həmin şirkətlə 72.676.870,15 AZN (yetmiş iki milyon altı yüz yetmiş altı min səkkiz yüz yetmiş manat, 15 qəpik) məbləğində müvafiq satınalma müqaviləsinin bağlanması nəzərdə tutulub. Məlumat satınalmaların portalında 01.10.2026-cı ildə dərc edilib.
Qeyd edək ki, “Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidməti” publik hüquqi şəxsi Zəngilan rayonu, Zəngilan kənd yaşayış məntəqəsində qeyri-yaşayış binalarının tikinti-quraşdırma işlərinin satın alınması üzrə 27.02.2026-cı ildə başlanmış açıq tenderdə də “19 SAYLI TİKİNTİ TƏMİR İDARƏSİ” MMC-ni qalib seçib. Tərəflər arasında 9.057.060,71 manat dəyərində müqavilə 15.09.2026-cı ildə bağlanılıb.
Ümumiyyətlə isə, “Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidməti 23.04.2024-cü ildən 19.09.2025-ci ilə qədər “19 SAYLI TİKİNTİ TƏMİR İDARƏSİ” MMC ilə ümumi dəyəri 172 435 175 manat olan 4 satınalma müqaviləsi bağlayıb.
Bundan 114.499.593,2 manat dəyərində müqavilə KESZ Group Azerbaijan MMC və 19 Saylı Tikinti Təmir İdarəsi MMC konsorsiumu ilə bağlanııb. Qeyd edək ki, “KESZ GROUP AZERBAİJAN” MMC-nin hüquqi ünvanı CƏBRAYIL RAYONU, CƏBRAYIL şəhəridir. Nizamnamə kapitalı 50000 manat olan MMC-nin qanuni təmsilçisi Macarıstan vətəndaşı IZSO OTTO -dur.
Göründüyü kimi “Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidməti” publik hüquqi şəxsi son iki ildə “19 SAYLI TİKİNTİ TƏMİR İDARƏSİ” MMC ilə ümumi dəyəri 250 milyon manatdan çox müqavilələr bağlayıb.
Bəs dövlət qurumunun qalib seçdiyi “19 SAYLI TİKİNTİ TƏMİR İDARƏSİ” Məhdud Məsuliyyətli Cəmiyyəti ilə bağlı nə kimi məlumatlar var? Bəs MMC bu dövlət sifarişlərini həyata keçirmək iqtidarındadırmı?
MMC-nin yaxınlarda yaradılan 19tti.az portalında yerləşdirilən məlumatlarda bildirilir ki, şirkətimizin əsas fəaliyyət sahəsi olaraq yaşayış və qeyri-yaşayış obyektlərinin tikintisi və təmiri, qazanxanaların və nasosxanaların tikintisi və avadanlıqlarla təchizatı, binaların elektrik xətlərinin, təsərrüfat-məişət kanalizasiya şəbəkəsinin, sahədaxili və sahəxarici su xətlərinin çəkilməsi, abadlıq-yaşıllaşdırma işlərinin görülməsi və digər bütün növ tikinti quraşdırma işlərini qeyd edə bilərik.
“19 saylı Tikinti Təmir İdarəsi” MMC yüksək peşəkarlığa malik işçi kollektivinə, mühəndis-texniki heyətə və böyük maddi-texniki bazaya malik olmaqla yanaşı, eyni zamanda inşaat və memarlıq sahəsində baş verən bütün yenilikləri yaxından izləyərək tikinti prosesində özünəməxsus metod və texnologiyalardan istifadə edir.
Rəsmi mənbələrdə, Dövlət Vergi Xidmətinin kommersiya qurumunun hüquqi şəxslərin dövlət reyestrinə daxil edilmiş məlumatlarında “19 SAYLI TİKİNTİ TƏMİR İDARƏSİ” (VÖEN:4700367351) Məhdud Məsuliyyətli Cəmiyyətinin 13.04.2011-ci ildə 3 saylı Ərazi Vergilər İdarəsində dövlət qeydiyyatına alındığı bildirilir. Nizamnamə kapitalı 890 000 manat olan MMC-nin hüquqi ünvanının QUSAR RAYONU, QUSAR Ş, KARL MARKS, ev 67, (MMC-nin faktiki hüquqi ünvanı Bakı şəhəri. Ələsgər Qayıbov küç 17-də yerləşir)qanuni təmsilçisinin isə Aslanov Loğman Fərəc oğlu olduğu göstərilir. Hüquqi şəxslərin reyestrinə daxil edilmiş məlumatlarda Qarayev Ramil İsmayıl oğlu, Məmmədoğlu Ramil Ramiz oğlu, İsmayılov Elçin Mail oğlu da müxtəlif vaxtlarda MMC-nin qanuni təmsilçiləri olub.
Qeyd edək ki, MMC-nin bir şübhəli tərəfi qeydiyyatda olduğu hüquqi ünvanla bağlıdır. Dövlət Vergi Xidmətinin məlumatlarında MMC-nin hüquqi ünvanı QUSAR RAYONU, QUSAR Ş, KARL MARKS, ev 67 göstərilir. Mərkəzi Seçki Komissiyasının seçicilərin siyahısında Qusar rayonu, Qusar şəhəri Karl Marks (hazırda Rövşən Nurullayev) küçəsi 67 ünvanında MMC-nin müxtəlif vaxtlarda qanuni təmsilçiləri olmuş Qarayev Ramil İsmayıl oğlu, Məmmədoğlu Ramil Ramiz oğlu, İsmayılov Elçin Mail oğlu və Aslanov Loğman Fərəc oğlunun heç biri burada seçicilərin siyahısında yoxdur və ümumiyyətlə olmayıb.
Göründüyü kimi “Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidməti” publik hüquqi şəxsi sadəcə Qusar şəhərində dövlət qeydiyyatına alınmış, lakin Qusar şəhərinə heç bir bağlılığı olmayan şəxslərin başçılıq etdiyi şirkətlə işbirliyi qurub. Ucqar bir rayonda qeydiyyata alınmasına baxmayaraq sözügedən şirkətin arxasında daha güclü şəxslər dayanmasa belə iri həcmli layihələrdə iştirakı mümkün olmaz.
Qeyd edək ki, “Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidməti” publik hüquqi şəxsin icraçı direktoru Xidmətin Müşahidə Şurası tərəfindən təyin edilmiş Növrəs Qəhrəman oğlu Cəfərovdur.

Aktualinfo.net

Son illərdə Azərbaycanda taksi fəaliyyətinin tənzimlənməsi, sürücülərin sertifikatlaşdırılması və imtahanlardan keçirilməsi ilə bağlı yeni qaydalar tətbiq olunub. Bu dəyişikliklərin əsas məqsədlərindən biri taksi xidmətinin keyfiyyətini yüksəltmək, sərnişinlərin təhlükəsizliyini təmin etmək və sürücülərin peşəkarlıq səviyyəsini artırmaqdır.

Lakin taksi xidmətlərindən istifadə edən vətəndaşların sosial şəbəkələrdə paylaşdığı narazılıqlar göstərir ki, bütün problemlər hələ də aradan qalxmayıb. Blogger Mehin Oktaylı da “Bolt” şirkətinin sürücülərindən narazılığını ifadə edib. O, sosial şəbəkədə paylaşdığı videoda bəzi sürücülərin davranışını, eləcə də avtomobillərin vəziyyətini sərt şəkildə tənqid edib.

“Sürücülərinizin yarısı çox bərbaddır. Maşınlarınız bərbaddır. “Biznes” çağırırsan, içi sınıq-salxaq maşın gəlir. Sürücülərinizin yarısının əlindən telefon düşmür, yola baxmırlar. Qəribə mahnılar qoyub, “avtoşluq” edirlər. Siz bu sürücüləri işə götürəndə onları nə üzrə test edirsiniz, necə işə alırsınız? Bir çoxu insanların həyatını riskə atırlar. “Komfort” və ya “Biznes” çağırırsan ki, rahat yol gedəsən. Amma sürücülərinizin əlindən necə rahat yol gedim?! Yolboyu içim əsir, əlimi sıxıram”, – deyə blogger bildirib.

Bu fikirlər taksi sürücülərinin işə qəbul prosesi, onların imtahandan keçirilməsi və sertifikatlaşdırılmasının real nəticələrinin nə qədər effektiv olması ilə bağlı suallar yaradır. Çünki son illərdə taksi fəaliyyəti ilə məşğul olmaq istəyən sürücülər üçün müəyyən tələblər tətbiq olunur və onların sertifikatlaşdırılması nəzərdə tutulur.

Bu halda isə sual yaranır: əgər sürücülər imtahandan keçirilirsə, niyə bəzi sərnişinlər hələ də sürücülərin davranışından, avtomobillərin texniki və xarici vəziyyətindən, eləcə də yol hərəkəti qaydalarına münasibətindən narazıdır? Bəs sertifikatlaşdırma və imtahanlar sürücülərin yalnız peşəkar sürücülük bacarıqlarını yoxlamaqla kifayətlənir, yoxsa onların sərnişinlə davranışı, etik qaydalara münasibəti və təhlükəsiz sürücülük vərdişləri də nəzərə alınır?

Mövzu ilə bağlı nəqliyyat məsələləri üzrə ekspert Eldəniz Cəfərov Musavat.com-a danışıb. Ekspert qeyd edib ki, sertifikatlaşdırma və imtahanların əsas məqsədi sürücülərin yalnız sürücülük bacarıqlarını deyil, həm də taksi sahəsində peşəkar fəaliyyət göstərməsini, etik qaydalara əməl etməsini və mövcud qanunvericiliyin tələblərinə uyğun davranmasını təmin etməkdir: “Əvvəlki dövrlərlə müqayisədə taksi fəaliyyətində sürücülərin davranışını daha müsbət qiymətləndirə bilərik. Məlumdur ki, əvvəlki illərdə sürücü-müştəri münasibətləri daha problemli idi. Ancaq hazırda da bəzi hallarda sizin qeyd etdiyiniz kimi, narazılıq doğuran vəziyyətlərə rast gəlinir.

Belə halların aradan qaldırılması üçün həm müvafiq dövlət qurumları, həm də taksi şirkətləri tərəfindən müştərilərin şikayət və müraciətlərinin qəbul edilməsi mexanizmləri yaradılıb. Müştəri sürücünün davranışından narazıdırsa, ilk növbədə istifadə etdiyi taksi şirkətinin operatoruna müraciət edə, eyni zamanda, taksi fəaliyyətini tənzimləyən dövlət qurumuna şikayət göndərə bilər. Qanunu pozan, müəyyən edilmiş qaydalara əməl etməyən sürücülərin müəyyənləşdirilməsi və taksi fəaliyyətindən kənarlaşdırılması prosesi də məhz müştəri məmnuniyyəti və daxil olan şikayətlər nəzərə alınmaqla həyata keçirilir".

Bakıda arvadını döyən kişiyə cinayət işi açılıb.

Hadisə Sabunçu rayonu, Ramana qəsəbəsi, Şuşa şəhərciyində qeydə alınıb.

Dövlət qurumlarının birində mütəxəssis işləyən 49 yaşlı Firdovsi Muradov (şərti adla) yaşadıqları evdə arvadını əlləri və televizor pultu ilə döyərək, bir sıra xəsarətlər yetirib.

Münaqişəyə səbəb isə qadının televizorun idarəetmə pultunu götürərək kanalı dəyişməsi olub. Bundan sonra tərəflər arasında sonu məlum zorakılıqla nəticələnən mübahisə başlayıb.

Faktla bağlı F. Muradov polis əməkdaşları tərəfindən saxlanılıb və barəsində cinayət işi açılıb.

Məhkəmə istintaqı zamanı tərəflər arasında barışıq əldə olunub. Təqsirləndirilən şəxs əməlindən peşman olduğunu, zərərçəkən qadın isə şikayət və tələbinin olmadığını bilirib.

Məhkəmənin qərarı ilə cinayət işinə xitam verilib və F. Muradov məsuliyyətdən azad olunub.

Nocomment.az

“İran tərəfi ABŞ ilə danışıqlar prosesinə inamını itirib, çünki hər dialoq raundundan sonra yeni sanksiyalar və zərbələr həyata keçirilir”.

Bu barədə Qətərin “Al Jazeera” telekanalına müsahibəsində İran Prezidenti Məsud Pezeşkian bəyan edib.

“Hər dialoqdan sonra hücumların və sanksiyaların təkrarlanması səbəbindən Vaşinqtonla danışıqlara artıq etibar etmirik. Hazırda iki ölkə arasında vasitəçilik rolunu Doha (Qətər) və İslamabad (Pakistan) həyata keçirir. ABŞ ilə qarşılıqlı əlaqələr anlama memorandumuna əsaslanır və Amerika administrasiyasını bu sənədlə bağlı mövqeyini dəqiq müəyyənləşdirməyə çağırıram”, – deyə dövlət başçısı vurğulayıb.

Qeyd edək ki, bu həftənin əvvəlində ABŞ Maliyyə Nazirliyi İranın aviasiya sektoruna qarşı sanksiyalar elan edib. Məhdudiyyətlər 27 şirkəti əhatə edib. ABŞ maliyyə naziri Skott Bessent xəbərdarlıq edib ki, İslam Respublikasının daşıyıcılarına yanacaq verən, eniş xidmətləri və bilet satışı həyata keçirən hava limanları və şirkətlər dollar maliyyə sistemindən ayrılmaq riski ilə üz-üzədirlər.

Bu sanksiya dalğası fonunda İran aviaşirkətlərinin Azərbaycan, Gürcüstan, Oman və İraq da daxil olmaqla bir neçə ölkəyə uçuşları ləğv edilib. Sentyabrın 24-də isə Birləşmiş Ərəb Əmirlikləri də bu qərara qoşulub.

Türkiyəli məşhur aktrisa Hande Erçel İtaliyanın Milan şəhərində keçirilən nüfuzlu moda tədbirində iştirak edib.

Aktrisa tədbiri ön sıradan izləyib. O, tül və korset detallı ağ libası ilə diqqət çəkib.

Tədbirdən sonra Hande Erçel dünyaşöhrətli müğənni və aktrisa Cennifer Lopezlə bir araya gəlib. Onlar birlikdə şəkil çəkdiriblər.

“Əgər münaqişə şiddətlənərsə, müharibənin coğrafiyasını dəyişdirəcəyik”.


Bunu İran İnqilab Keşikçiləri Korpusunun (SEPAH) sözçüsü Hüseyn Mühibbi deyib.


“Müharibənin coğrafiyasını mütləq dəyişdirəcəyik. Meydana yeni imkanlara malik yeni silahlar yerləşdirəcəyik. Dünya silahlarımızın gücünə və dəqiqliyinə şahid olacaq və heyran qalacaq”, - Mühibbi əlavə edib.


O, yeni hədəflərə yönələ biləcəklərini də qeyd edib: “Hədəflərimizin əvvəlki kimi olması vacib deyil”.


Mühibbi vurğulayıb ki, SEPAH uzunmüddətli müharibəyə hazırdır.